FESTIVAL DE CINE ASTURIANU

viernes, 23 de abril de 2010

Entrevista a Xaviel Vilareyo: "El cine asturianu ye mui realista"



Xaviel Vilareyo cola so obra Historia del cine asturianu fizo una teoría novedosa y tou un análisis completu del aniciu y desenrollu del cine asturianu, conceptu que desplica nel llibru y qu'amuesa a lo llargo de les sos 400 páxines. Hasta’l momentu, anque pueda sorprender, nun se fixera n’Asturies una historia completa sobre’l cine asturianu. Había un vacíu por rellenar y Xaviel Vilareyo y Villamil (Mieres del Camín, 1967), director del Festival del Cine Asturianu, qu’esti añu vivió la sesta edición, decidióse a recopilar datos que, finalmente, permitieron la edición de ‘Historia del cine asturianu’ (Espublizastur), un llibru que nun pue faltar na biblioteca de los cinéfilos asturianos. Nél, el llector va alcontrar información sobre tola actividá que tuvo’l cine n’Asturies dende la primer proyección, un 13 d’agostu de 1896 nel antigu Teatru Xovellanos de Xixón, hasta los nuesos díes, amás d’una filmografía completa del cine asturianu.

-¿Cómo surde la ideya de trabayar nuna ‘Historia del Cine Asturianu’?

La ideya sal a raíz del Festival de Cine Asturianu. Yera necesariu facer una historia un poco completa del tol cine asturianu pa xustificar la esistencia propia del festival. Decidí facer un trabayu y esi trabayu convertióse nun llibru en dos años. Fui, poco a poco, recoyendo datos, diendo a filmoteques y biblioteques… Pa min foi un trabayu prestosu de facer.

-¿Nun-y resultó complicao dar con tola información que recueye nel llibru?

Los más problemático foi facer una construcción cronolóxica que tuviera cierta coherencia interna, porque había datos que se solapaben nel tiempu. Ési foi el trabayu más complicao pa min.

-¿Foi difícil dar cola información sobre los ainicios del cine asturianu?

Lo más complicao foi atopar información de les époques más modernes, porque hai bastantes trabayos sobre la etapa de los oríxenes del cine. Quiciabes falta información sobre’l tiempu de la República y el franquismu, onde hai menos publicao sobre’l cine n’Asturies.

-Vusté divide’l llibru en delles etapes.

Quería facer una cronoloxía didáctica marcando etapes: cuándo surde’l cine de ficción; el cine falante; la Guerra Civil y la dictadura, llende que marca un antes y un depués; cuándo surde’l cine comercial; el d’autor; la etapa autonómica; los nuevos realizadores… Éstos, a grandes rasgos, son los capítulos que voi marcando a lo llargo de la historia del cine asturianu.

-¿Tien en mente afondar más nel tema?

La mio ideya ye que’l llibru continúe porque la historia del cine sigue. Esperemos que tenga ésitu pa poder facer más ediciones y dir ampliándolu a les películes nueves. De xuru que quedaron munches coses por sacar a la lluz. Por ello, animo a tol mundu que siga investigando y qu’eche una mano tamién. Pa min ye una responsabilidá escribir la historia del cine asturianu dende los oríxenes; ye un llabor ampliu. De toes formes, creo que como llibru compactu quedó bastante bien y toi mui contentu del resultáu. Agora hai que siguir investigando, trabayar y sacar nuevos datos, nueves películes y autores. Hai una xeneración nueva que ta con munches ganes de salir alantre y de facer películes. Esperemos que’l cine asturianu vaya a más.

-¿Cómo ye la salú del cine asturianu?

Hai muncha xente que ta faciendo coses y quier dedicase a facer cine, non sólo nel planu artísticu, tamién nel técnicu pero falta industria y medios. Los realizadores nuevos deberíen tamién adaptase a les tecnoloxíes nueves. Pienso que’l futuru del cine ye dixital, y facer cine dixital ye una cosa mui barata. Lo que pasa ye que cuando fales de cine dixital, los directores y realizadores venlo como dalgo menor: ellos quieren rodar en cine tradicional, dalgo que ye mui caro agora y pa lo que se necesita una bona financiación.

-¿Nun hai trabayos en cine dixital?

Sí, pero paez que tovía rodar en formatu cine ye dalgo más prestixosu. Evidentemente, el cine con estes cámares ye un cine mui bonu, pero la tecnoloxía dixital avanzó tanto que ye’l futuru del cine. Si s'axusten presupuestos, porque ta claro qu’hai que pagar actores, equipos y mover xente, se pue facer n’Asturies coses mui dignes ensin un gastu altu.

-¿Hai que colar d’Asturies pa trunfar nel mundu del cine?

Nun creo que sía necesario colar pa Madrid pa trunfar. Agora tenemos inclusive estudios de cine, los que se quieren facer n’Olloniego, lo que facilitaría’l rodaxe n’interiores. Pienso que ye al revés: son munches más les producciones de Madrid que vinieron rodar esteriores a Asturies polos beneficios paisaxísticos que tenemos poles nueses montañes, la mar o la lluz tan cinematográfica qu’hai. Entós, tamién tenemos toles ventayes pa rodar cine n’Asturies. El problema ye la falta de productores, porque tenemos directores, actores, técnicos… Pero les que manden son les productores y son de fuera, lo que lleva a que’l director asturianu nun mande na producción. Fai falta una productora asturiana que diga “vamos facer una producción asturiana al cien por cien” y que se contrate a técnicos y actores asturianos. Esto failo Garci, director que tantes crítiques recibe. Nes sos películes sí que participen técnicos asturianos y cuida qu’haya asturianos na película. L’exemplu de Garci había qu’estendelu a tolos realizadores.

-Nel so llibru, dedica un capítulu completu a José Luis Garci pese a nun ser asturianu.

Non tol cine de Garci podemos consideralu asturianu, pero dientro la so producción hai unes películes que sí podemos calificales como asturianes bien porque les rodó equí n’Asturies o porque la temática ye mui asturiana. Él nun nació n’Asturies, pero podemos calificalu como un asturianu d’adopción. Amás, él presume de ser asturianu.

-¿Cómo ye l’usu de la llingua asturiana nes películes rodaes n’Asturies con capital esterior?

Tenemos dos exemplos mui claros. Ún ye ‘Carne de gallina’, onde la fala asturiana sí que tuvo más cuidada. Nel casu d’Anabel Alonso, ella molestóse en deprender el vocabulariu y el tonu, y foi al Centru Asturianu de Madrid pa ver si había dalgún métodu pa deprender asturianu. Una bona actriz ha preocupase tamién y Alonso, siendo vasca, fixo un papel d’asturiana bastante bonu. A la contra tenemos ‘La torre de Suso’, onde los actores madrilanos nun se molestaron muncho en reproducir la fala asturiana y el so dexe madrilanu na película chirriábanos. Ello depende muncho del director, anque tamién del actor. Hai películes que sí requieren un usu de la llingua especial, porque forma parte de la idiosincrasia de la película. Pue facese una película asturiana en castiellanu y nun pasa nada, pero cuando los personaxes tan mui metíos nel mundu rural, la película sí que pide un usu de la llingua más efectivu.

-¿Hai dalguna característica que pudiera definir el cine asturianu nos sos más de 100 años d’historia?

Sí, pue dicise que’l cine asturianu ye un cine mui averáu a la realidá, al documentu, al paisanaxe, a reproducir un poco les esencies. Igual nun ye dalgo buscao, sinón que los directores sían inconscientes d’ello. Cuando venía a Asturies a rodar Gonzalo Delgrás o otros profesionales, intentaben reproducir les esencies asturianes. Por eso podemos dicir que’l cine asturianu ye mui realista. Nun hai munches producciones asturianes de ciencia ficción o historicistes, como pudiera ser sobre la monarquía asturiana. Son películes mui apegaes al terruñu y esa ye una constante en tola historia del cine asturianu, lo que nun quita que se pudiera facer otru tipu de cine n’Asturies.

-El llibru tien una edición mui curiosa y destaca poles sos semeyes.

Un llibru sobre cine tien que tener munches semeyes y la pena d’esti llibru ye que munches semeyes tuvieron que quedar fuera. Evidentemente, material gráficu teníemos abondo pa mostrar una historia del cine asturianu, pero nun podíemos abusar de tanta semeya porque si non saldría una revista ilustrada y la ideya yera facer un llibru que recoyera, en testu, la historia del cine asturianu. Pa futures ediciones espero poder meter más semeyes y facer un llibru más visual nel que poder introducir una bona cantidá de cartelos de les películes que, pa min, tamién son una obra d’arte.

-¿Queda muncho por recopilar sobre la historia del cine asturianu?

Sí, queda tovía muncho por facer, por eso animo a tol mundu a que llea’l llibru, pero tamién a qu’investigue. El campu ye mui ampliu y sedría importante investigar cómo se recibieron les películes, cuáles gustaron más o menos, cuáles foron acertaes… Facer una llabor de crítica de les películes que ye un tema mui interesante y que requier un poco d’atención por parte de tolos asturianos porque’l cine ye una seña d’identidá mui importante pa una nación.
INFOASTURIES

viernes, 9 de abril de 2010

HISTORIA DEL CINE ASTURIANU, nuevu éxitu de la Editorial Espublizastur




El volume Historia del Cine Asturianu (de la editorial Espublizastur) ta acabante llegar a les llibreríes del país de la mano del so autor Xaviel Vilareyo. Ye ésta una antoloxía bien novedosa, al ser la primer vez que s’espubliza una historia completa del cine asturianu. El llibru, con cuatrocientes páxines, tien bien d’elementos gráficos (fotografíes, fotogrames, cartelos…) y abondos datos historiográficos y fílmicos, supón una novedá perllamativa pa la bibliografía sobre la filmografía asturiana al ser el primer ensayu fondu sobre esti tema.Según se pue lleer na contraportada del llibru: «La historia del cine asturianu ye una historia inda non estudiada a xeitu. Esti llibru ye’l primer planu xeneral d’un edificiu que se tien que restaurar: el del cine asturianu, el cine realizáu polos asturianos. La historia interna de les motivaciones, inquietúes, tendencies, ambiciones y oxetivos de los directores asturianos y la configuración creativa de tol procesu conxuntu na realización de les películes asturianes ye un tema interesante que requier con urxencia una mínima atención por parte de toos».Xaviel Vilareyo y Villamil (Mieres del Camín, 1967) ye músicu, escritor y profesor. Recibió los premios de lliteratura Valentín Andrés, Vila de Sarria, Elvira Castañón y Xeira. Ganó’l Premiu de Teatru de l’Academia de la Llingua 2009, añu nel qu’estrenó la so primer obra dramática, La vocación. Fundador y director del Festival de Cine Asturianu dende 2005, realizó tamién los curtiumetraxes titulaos Salvemos el teatru (2009), La vocación (2009) y el documental Ensin xéneru de duldes (2009).

jueves, 8 de abril de 2010

Juan José Otegui: "Ésti ye un premiu mui emocionante"



Juan José Otegui, Premiu d'Honor del 6u FESTIVAL DE CINE ASTURIANU




jueves, 1 de abril de 2010

Historia del Cine Asturianu, de Xaviel Vilareyo. Una güeyada al cine asturianu



Xaviel Vilareyo, buiciegu investigador y divulgador de la cultura asturiana, ye poeta, narrador y autor de teatru, escribiendo unes veces n'asturianu, otres en galaicoasturianu y tamién en castiellanu. D'un tiempu a esta parte vien emprestando atención al cine, organizando dende l'añu 2005, n'Uviéu, el Festival de Cine Asturianu. D'esa dedicación vien la Historia del cine asturianu qu'acaba publicar, una verdadera enciclopedia que repasa dende los oríxenes documentales del xéneru pocos meses depués de que se presentara l'inventu de los hermanos Lumière en París, hasta los últimos curtios fechos n'Asturies. El criteriu de cine asturianu que remana Vilareyo ye mui ampliu, quiciabes demasiao: el que se fai n'Asturies en cualquiera de les sos llingües, el que fai un asturianu en cualquier parte del mundu, el que se fai d'ambiente o de tema asturianu y el que se rueda n'Asturies, ensin más. Tamién el criteriu d'asturianidá desborda les convenciones a les que tamos avezaos. Asturianu ye lo que ta nos límites xeográficos de l'actual autonomía, pero igualmente lo qu'hai alredor: lo que se fai na montaña lleonesa (Babia, Llaciana), lo de les Asturies de Santiyana (asina lo escribe) y tamién-y toca a Galicia, porque pa Xaviel Vilareyo Fonsagrada tamién ye zona de cultura asturiana. Nel llibru echamos de menos una referencia sobre los primeros pasos d'un cine n'asturianu alredor de Conceyu Bable, tema sobre'l que tenemos sentío falar a Lluís Álvarez dacuando, y pareznos descompensáu'l tratu que se da al Festival de Cine de Xixón (unes llinies) frente al más nuevu y bien modestu Festival de Cine Asturianu, quiciabes porque lu dirixe y presenta l'autor del llibru. Tampoco parez que seya un criteriu acertáu traducir los títulos de les películes al asturianu (y non toes) ensin poner l'orixinal, cuando la gran mayoría nunca s'estrenó n'asturianu. Pero lo que más necesitaba un llibru como esti yera un índiz de títulos y otru de nomes propios, que facilitaríen abondo la consulta puntual. Amás del trabayu globalizador, Xaviel Vilareyo tien l'aciertu de contextualizar lo que se ta filmando n'Asturies con referencies a les películes más conocíes de la industria mundial. Si quitamos un trabayu mui breve de Juan Bonifacio Lorenzo de los años ochenta, y estudios bien interesantes sobre aspectos parciales o locales, nun había un repás xeneral al desenvolvimientu d'esta arte n'Asturies, colo qu'esta publicación, un llibru de referencia ensin dulda, permite facese una idea bien completa del camín percorríu pol cine nesta tierra, nel sieglu llargu de vida.
Antón García
LNE
1-ABRIL-2010